Phantom limb !
تخيل ان ٦٠ ل ٨٠ ٪ من الأشخاص اللي تعرضوا لبتر طرف او عضو من الجسم او حتى خلع الأسنان بيعانوا من الظاهرة دي.
ألم او شعور ف الجزء اللي مبقاش موجود اصلا ف جسمهم!!
ف الاول اعتقد الاطباء ان الموضوع دا نفسي و مجرد توهم للألم اللي كانوا بيشعروا بيه، أو أنه ألم ف الجزء المتبقي او المحيط بالمكان دا.
لكن الخبراء اكدوا بعد كدا ان الأحاسيس دي حقيقية فعلا و بتنشأ في النخاع الشوكي والدماغ، لما عملوا بعض الأشعة على شخص تعرض للبتر و اكتشفوا ان اعصاب الجزء المبتور بتدي إشارة لما بيحس بالالم الوهمي دا .
ف فرضيتين عالكلام دا.. الأولى ان دي استجابة لإشارات مختلطة من الدماغ بعد البتر بتفقد مناطق النخاع الشوكي والدماغ المدخلات من الطرف المبتور وبتتكيف بطرق لا يمكن التنبؤ بها و النتيجة الشعور بالالم.
و التانية ان الدماغ ممكن يعيد رسم الدوائر الحسية ف جزء تاني من الجسم، فأي احتكاك او تعرض لشيء ف المكان دا يحس انه جاي من الجزء المبتور بسبب الدواير الحسية.
طبعا الاحساس الناتج بيختلف من شخص لغيره، و بيتنوع كمان يعني مش لازم احساس بألم، ممكن حكة، سخونة او برودة، دغدغة، أو حتى ألم متفاوت ف شدته، أو رعشة او احساس انه موجود فعلا بس فيه حاجه مش مظبوطة كأنه اقصر او أطول.
و بيفضل الطرف دا بالنسبة للشخص موجود كأنه طرف شبح-Phantom limb.
بالنسبة للأشخاص اللي اتولدوا من غير الأطراف او الأعضاء دي او مصابين بالشلل و بيعانوا من ألم او أعراض زي اللي فاتت ف دا هو الألم الوهمي او الألم الشبح- phantom pain.